حمد باری تعالیٰ
بشارت احمد بشارت
جے کوئی تیرا یار ہو جاوے
اوہدا سارا جہان ہو جاوے
چنگا تینوں بڑا اوہ لگدا اے
جہڑا اپنے گناہ دھو جاوے
ہاسے اوہدا نصیب بن جاندے
جہڑا وچ سجدیاں دے رو جاوے
تیرے در تے کدے اوہ نہیں آوندا
لیکھ جس آدمی دا سو جاوے
روشنی ونڈدا اے زمانے تے
جہنوں مل تیرے کولوں لوء جاوے
ہادی جس نوں بناویں توں مولا
اوہ زمانے دے دل نوں موہ جاوے
اے کریما! ترے کرم باجھوں
پاپی دنیا چ بندا کھو جاوے
