غزل

الیاس آتش

خوشیاں روز مناواں تیرے شہر دے وچ
جیون نوں مہکاراں تیرے شہر دے وچ
بھاویں تیرے شہر دے حاکم ڈاڈھے نیں
میں پیا دیپ جگاواں تیرے شہر دے وچ
بھانبڑ بلدے ویکھاں گھر گھر دے وچ میں
کلاّ اگ بجھاواں تیرے شہر دے وچ
ہرتھاں ای اے عالم نفسا نفسی دا
میں کہنوں سمجھاواں تیرے شہر دے وچ
جھوٹھے عدل کردے نہیں انصاف کدے
سچ دا ہوکا لاواں تیرے شہر دے وچ
غم تے خوف ذرا نہیں ہندا عاشق نوں
تینوں ویکھن آواں تیرے شہر دے وچ
چھڈ قرآن نوں ہور کتاباں پڑھدے نیں
میں قرآن سناواں تیرے شہر دے وچ
تھاں تھاں نظریں آون اج یزید بڑے
حق دا نعرہ لاواں تیرے شہر دے وچ
آتش منہ آئی گل کر کے چھڈاں گا
بھاویں سر کٹواواں تیرے شہر دے وچ