غزل

ارشاد کھوکھر

کر جا کوئی کم اجیہا زمانہ جہڑا یاد کرے
اوہو بندہ ہوندا جہڑا نگری نوں آباد کرے
پینا اے تے پے جائے گھاٹا سوچ دوجے دا فیدہ
بوہتا پڑھن دے نالوں پڑھ لے اک نیکی دا قیدہ
رب وی خوش ہوندا جد کوئی روندے دل نوں شاد کرے
کر جا کوئی کم اجیہا زمانہ جہڑا یاد کرے
ایہہ جندڑی نہ کوئی جندڑی جندڑی ہیگی اگے
جندڑی ملنی اوہنوں جہڑا آکھے رب دے لگے
لہو اپنا وی معاف کریں توں قاتل جے فریاد کرے
کر جا کوئی کم اجیہا زمانہ جہڑا یاد کرے
ہو جاویں گا زندہ سدا کم جے چنگا کر گیا
کسے وی تیرا ناں نہیں لینا ایویں جے توں مر گیا
اوہ برباد ہو جاندا جہڑا دوجے نوں برباد کرے
کر جا کوئی کم اجیہا زمانہ جہڑا یاد کرے
فیدہ ساہواں کولوں چُک آخرت سوہنی بنا لے توں
رب سوہنے دے کھاتے اندر اپنا نام لکھا لے توں
کریا کر عمل ارشاد جو وی رب ارشاد کرے
کر جا کوئی کم اجیہا زمانہ جہڑا یاد کرے