غزل
شکیل امجد صادق
پیار پریت دیاں سبھے رسماں میٹ لئیاں
اج وی ویکھ کے اونے اکھیاں میٹ لئیاں
اونے سدھراں دور کتے دفنائیاں سن
میں وی دل وچ لیکے لکھاں میٹ لئیاں
میں تے آس دا ٹھوٹھا دل نوں لایا اے
اوہنے وعدے آساں قسماں میٹ لئیاں
ناں کوئی چاچا ناں کوئی تایا لبھدا اے
ہن تے جگ نیں ساریاں رسماں میٹ لئیاں
مُل خون دا سجنوں کوڑی لگا نہیں سی
لال ہنیری ویکھ کے نظراں میٹ لئیاں
اوہنوں میں دفنا کے امجد ٹریا نہیں
دل نیں کل حیاتی قبراں میٹ لئیاں
