غزل
عبادنبیل شاد
وصل سنیہا دیون والا اک وی نہیں
یار دلاسا دیون والا اک وی نہیں
اج دی کربل چوں میں کلا بچیا واں
مینوں پرسا دیون والا اک وی نہیں
سارے سجن پالو پال پہاڑ بنے
مینوں رستا دیون والا اک وی نہیں
چارے رُتاں خانیوں کڈھی رکھدیاں نیں
موسم حوصلا دین والا اک وی نہیں
سارے لوک انھیرے سانبھی بیٹھے نیں
روشن تارا دیون والا اک وی نہیں
شاعرو‘ موسیقارو ایتھے چپ رہوو
ساتھ تہاڈا دیون والا اک وی نہیں
