غزل
کرم علی کیفی
سچ سچ بولاں بھاویں دکھڑے سہندا رہاں
حق دیاں گلاں دار اُتے وی کہندا رہاں
مر کے جیواں ادھماں عزماں پاروں میں
وچ سمندراں سورج وانگوں لہندا رہاں
کوئی نویں سدھر نہیں محلیں وسن دی
جتھے رہنا واں اوتھے ای رہندا رہاں
تھاں تھاں ونڈاں اپنے پیار پراگیاں نوں
ویر کرودھاں دے نال نت میں کھہندا رہاں
مان کراں نت پیار کراں انساناں نوں
دل رکھن لئی میں جت کے وی ڈھہندا رہاں
ہر تھاں میں منافق حاسد لوکاں توں
کوشش کرنا دور پریرے بہندا رہاں
ڈرنا کیفی جی میں جھوٹھ تکبر توں
نیڑے کدی نہ جاواں آپ تریہندا رہاں
