غزل
ارشد منظور
بڑے ہوندے چکر مدھانی دے اندر
تے کجھ وی نئیں کردی ایہہ پانی دے اندر
رہنی زمانے تے زندہ حقیقت
اداکار مر گئے کہانی دے اندر
تے گنڈھ گنڈھ کے پوٹے وی گھس گئے اساڈے
بڑے تند ٹٹے نیں تانی دے اندر
تے چھابی کنالی پیالا تے جھجر
سی دو چار بھانڈے نمانی دے اندر
نویں نے تے کجھ وی نظارہ نئیں دِتا
بڑا ای سرور اے پرانی دے اندر
زمانے دے اتے میں ویکھی اے دوزخ
میں جنت نوں تکیا اے ھانی اندر
او ارشد کدی وی نئیں ہوراں چوں آئی
جوخشبو اے راتاں دی رانی دے اندر
