غزل
یونس بھٹی
بدبودار تے بندے مارو ریتاں توں انکاری ہاں
نفرت ونڈن والے مندر مسیتاں توں انکاری ہاں
میں کلا ای چنگا واں تے کٹ لاں گا اکلاپے میں
متر کھاون والے سنگ پریتاں توں انکاری ہاں
بے شک بھانویں تختاں اتے بیٹھے ہوون مینوں کیہ
ایہناں دھرتی چوراں من پلیتاں توں انکاری ہاں
نفرت اے ادیباں کولوں جو جو وی درباری نیں
شاہ دی شان چ لکھے سارے گیتاں توں انکاری ہاں
رب، رسول تے پنجتن پاک نے راکھے یونس بھٹی دے
تھاں تھاں وکدے جعلی سبھ تویتاں توں انکاری ہاں
