غزل

نورمحمدنور

جیون دی ہر تمنا کر کے نیلام میری
پھردی ہے گھر کسے دے ہر روز شام میری
ایناں کو رہِ گیا ہے اختیار زندگی تے
ٹردا ہے ہور کوئی پھڑ کے لگام میری
اک دن میں بھٹکدا ساں روٹی دے ٹکڑیاں نوں
دن پھردیاں ہی بھلی ہستی مقام میری
پے کے پنگھوڑیاں تے ستے نے لوک سارے
کر کے گئے نے جہڑے نیندر حرام میری
انج بن گیا ہے موسم غمگین زندگی دا
ٹھردی دوپہر میری بھکھدی ہے شام میری
سو وار دیکھیا ہے سمجھا بجھا کے اس نوں
تکڑے نوں کد ہے کردی عادت سلام میری
گڈی محبتاں دی جد وی کتے چلائی
موقعے تے ہو گئی بس قسمت ہی جام میری
چسکا ہے شاعری دا جس نوں اوہ نور ہاں میں
اج کل دے شاعراں وچ چرچہ ہے عامَ میری