غزل
الیاس آتش
اوہ رہندا ہر دم نال نی
مرا مرشد اے لجپال نی
نت دیوے درشن مکھ دا
نہ ٹالے کدے سوال نی
میں ذکر کراں نت اوس دا
جو لیندا آپ سنبھال نی
میں پکا دشمن جانناں
ایہ نفس مرا دجال نی
جے چاہویں لذت وصل دی
توں توڑ دے سب جنجال نی
آوے گا رانجھا ویہڑے
توں شوق دا دیوا بال نی
سب کہن سہاگن تجھ نوں
کیہ بڈھے، گبھرو، بال نی
بن رانجھن جی نہیں لگدا
پل گزرن جیویں سال نی
جے راز حقیقت کھولناں
لہہ جاندی میری کھال نی
نہ دے ہوراں نوں مت توں
توں اپنا آپ سنبھال نی
چھڈ قاضی دی گل رہن دے
آتش دا بھانبڑ بال نی
