پورا بندہ کوئی کوئی ہوندا اے
خالدحسین تھتھال
بندہ سارا اوہ نہیں ہوندا
جیہڑا سانوں نظریں آؤندا اے
بندہ گُجھا وی ہوندا اے
جیہڑا نظریں نہیں وی آؤندا
نہ ای بندہ ٹُردا پھردا
کار ویہار تے کھیکھن کردا پاتر اے اک
بندہ تے اک جہان وی ہوندا اے
جیوں جزیرہ یا سمندر
یا زیویں اسمان وی ہوندا اے
بندہ ساہمنے بیٹھا ہووے
سارا اوہ موجود نہیں ہوندا
جو اوہ دسدا اے اوہ نہیں ہوندا
بندے نے تے سوچاں تے وی
اُچھاڑ چڑھائے ہوندے نیں
نہ ای اوہنوں دیکھن والا
آپوں اوتھے حاضر ہوند ا اے
نہ ای اوہنوں سارے نوں
اوہ دیکھنا چاہندا اے
بندہ اپنے قد بُت نال ای
نِکا وڈا نہیں ہوندا
نہ ای اپنی دکھ نال ہوندا اے
نہ ای مُنہ متھے نال ہوندا ے
نہ ای رُتبے زیویں بھانڈے
پیسے پونجی نال ہوندا اے
بندہ کُبندہ وی ہوندا اے
بندہ بندہ نہیں وی ہوندا
بندہ سادھ پیغمبر وی
بندہ ای شیطان وی ہوندا ے
بندہ پشوں درندہ وی
بندہ ای انسان وی ہوند ا اے
بندہ ڈھب ورتب نال ہوندا اے
سوچ وسب تے چج نال ہوندا اے
بندہ سانجھ سِیر نال ہوندا اے
بندہ اپنی گل نال ہوندا ا ے
اپنے کرم عمل نال ہوندا اے
اپنی میں نوں مار کے بندہ
بندیائی دے نیڑ ے آؤندا اے
بندہ اپنے آپ دا ای نہیں
بندہ لوکاں دا وی ہوندا اے
بندہ سارے جہان دا ہوند ا اے
بندہ جہان نوں اپنا جانے
اپنے آپ نوں جہان دا سمجھے
بندہ اپنے آپ نوں سمجھے
تاں فیر بندہ بندہ بن دا اے
بندہ اک بجھارت ہوندا اے
پُورا بندہ کوئی کوئی ہوندا اے
بندہ ہووے نہ وی ہووے
بندہ پُورا ہو جاندا اے
