نواں سال
جاوید پنچھی
فیر مبارک ہووے تینوں سال نواں
میرا ہون دے جو وی ہووے حال نواں
اوہنوں ساتھ نواں مبارک سانوں تے
ایتک وی اے پیار دا لبھنا کال نواں
تتلی وانگوں خورے اوہدی عادت اے
اِک پھُل چوس کے دوجا لینا بھال نواں
روز دیہاڑی لبھ جاندا اے اوہنوں کوئی
میتھوں ودھ کے پیارا نینی تال نواں
میری قسمت وچ ای نھیرا لکھیا اے
اوہنے دیوا وکھرا لیا اے بال نواں
اوہدی وچ اُڈیک کھلوتا ہویا اے
لے کے کوئی خُشیاں بھریا تھال نواں
جہنوں نال خُشی دے آگو متھیا سی
اوہنے پایا ساڈے گل جنجال نواں
راتیں اوہنے فیر منگائی کیتی اے
اوہنے رج کے کھانا اے فر مال نواں
اوہنوں آکھو ساڈی ہمت مُک گئی اے
ہُن نہ دیوے صدما کوئی وکھال نواں
اوہدے ناں دا نعرا لا کے پنچھی جی
میں وی لینا غم ہُن اپنا ٹال نواں
