اکھیاں

منصور عزمی

میں ساندل دھرتی دا پُتر میرا مان پنجابی اے
میں پنج پانیاں دے نال گُجھا میری پچھان پنجابی اے
لِکھاں پنجابی، بولاں نالے سوچاں وچ پنجابی دے
میرا ہر ویلے دا مِتّرا پڑھن پڑھان پنجابی اے
میرے لُوں لُوں دے وچ رَچیا ایناں دیس پنجاب دا رنگ
میں پنجاب دا جمیا جایا، دین ایمان پنجابی اے
لسّی، مکھن ، پیڑے ،ساگ سرنہوں دا روٹی مَکی دی
میرا پِین پنجابی اے تے میرا کھان پنجابی اے
جُگنی، ڈھولے، ٹَپّے، ماہیے، کِکلی، سَمّی، جُھمبر وی
گِدھا، لُڈی، بھنگڑا میرا نچن گان پنجابی اے
جے سِکھیاواں سِکھنا چاہنا ایں پڑھ لَے فیر پنجابی توں
سمجھن تے سمجھاوَن لئی بڑی اسان پنجابی اے
عزمیؔ اِس پنجاب نے مینوں جیون جوگا کیتا اے
ماں بولی اے میریاں ساہواں میری جان پنجابی اے