غزل
جاوید پنچھی
اسیں ہاں یار متراں دے ، اسیں ہاں شیر پنجابی
نہ رہنی دُور ساتھوں اے، ایہ بہتی دیر پنجابی
اسیں دُلّے، اسیں بُلّھے، اسیں وارث زمانے دے
اسیں وریام دے وانگوں نہ ہُندے زیر پنجابی
بڑا مِٹھّا بڑا سوہنا پیارا ایس دا لہجا
ڈبو لیندا اے وچ اپنے ایہ گھمن گھیر پنجابی
سَنے مِتراں ٹُراں گے جے اکٹھے ہو کے سارے جی
لواواں گے سکولاں وچ اسیں وی فیر پنجابی
زمانا آکھدا رہے گا مِرے توں بعد پنچھی نوں
کہ تُوں لائے نیں لکھ لکھ کے بڑے ای ڈھیر پنجابی
