غزل
جاوید عارف
چاہون والے گھٹ گھٹ جپھیاں پاون والے
کدھر ٹر گئے اپنا حق جتاون والے
کوڑیاں پھکیاں میریاں گلاں سن کے بولے
کد ہوندے نیں سارے درد ونڈاون والے
میں تے تیرے ظلم نوں سہہ کے رو لینا واں
آ جاون گے تینوں وی تڑپاون والے
ربّا! تیریاں کھیڈاں نیں ہن میں کیہ بولاں
چھیتی ٹر گئے سانوں گود کھڈاون والے
چند گھراں وچ دولت مینہہ دے وانگوں ورھدی
باقی سارے دھپاں وچ کرلاون والے
ہن تے ربا آن اجاڑاں گھر وچ پئیاں
بھیج فرشتے ایدھر جھاتی پاون والے
ویکھ دلا! ہن آن بڑھاپا طاری ہویا
ہن نہیوں دن اپنا آپ مناون والے
عارف ہن تے نکرے لگ کے ویلا کڈھ لے
ٹر گئے یارا! تیرے ناز اٹھاون والے
