نکی عید تے ماں دیاں یاداں

سید ضیغم عباس کاظمی

عیداں تے مبارکاں نہ دینا سانو خاں جی
خوشیاں ونڈان والی ٹر گئی اے ماں جی
ماں دیاں یاداں نے ستایا پل پل اے
دسے نہ سیانا اس مسئلے دا حل اے
ساڈیاں خطاواں اتے رسنا ضرور سی
سانوں نئیں سی پتہ ٹر جانا بڑی دور سی
سونے وانگوں خالص پیار کون دے گا
تیرے باجوں دل نوں قرار کون دے گا
دکھ تکلیف وچ تیرے اتے مان سی
تیریاں محبتاں دے وچ ساڈی ایہ جان سی
کوکلہ چھپاکی جمعرات اسی کھیڈنا
جد گڈی گڈے دی برات اسی کھیڈنا
ہس ہس ڈِھڈ وچ ول تینوں پیندے سن
بچیاں تے واری واری جان تینوں کہندے سن
مصیبتاں دے وچ تیری گود دا سہارا نئیں
ٹٹی ہوئی کشتی نوں لبھدا کنارا نئیں
قبراں دے وچ وی توں آس تے امید ایں
تیریاں دعاواں ساڈی فتح دی رسید اے
میرے پت ضیغم بس تیرا ای خیال آ
ماں دی دعا ہر دم تیرے نال اے