بندہ کنی تھاں ول سکدا اے؟

نذیرقیصر

دھرتی تے اسمان وچکار
وچکار کھلو کے
بندہ کنی تھاں ول سکدا اے
بارش دے وچ چھتری جنی
شکر دوپہر بلدی دھپ وچ
اک رکھ دے پرچھاویں جنی
اپنے وزیٹنگ کارڈ دے اُتے
چھاپے ہوئے ناویں جنی
بندہ کنی تھاں ول سکدا اے؟
سون لگیاں پلنگ دے اُتے بستر جنی
فجر دے ویلے فرش دے اُتے
اپنے بوٹ دے نمبر جنی
بندہ کنی تھاں ول سکدا اے
دفتر دے وچ کرسی جنی
ٹیل اُتے تھکی ہوئی فائل جنی
گھاہ دے اُتے چادر جنی
کسے سرہانے اکھیوں ڈلھے ہنجو جنی
واء وچ کھلرے ہاسے جنی
گل وچ پائی کفنی جنی
ہتھ وچ خالی کاسے جنی
بندہ کنی تھاں ول سکدا اے
چنی دے وچ تارے جنی
ٹُٹی ہوئی پینگھ دے
اک ہلارے جنی
لیٹر بکس وچ پائی ہوئی چٹھی جنی
پیراں تھلے جاگدی ہوئی دھرتی اُتے
اپنی قبر دی مٹی جنی
دھرتی تے اسمان دے
وچکار کھلو کے
بندہ کنی تھاں ول سکدا اے