غزل

اقتدارجاوید

ساڈے اندروں سانوں کڈھ کے ساڈے اندر وڑیوں
نالے سانوں مار مکایا نالے آپے سڑیوں
توں آیوں تے ظاہر ہوی وقت دی انھی کان
دنیا دی انگوٹھی اندر وانگ نگینے جڑیوں
اکھاں دے وچ باقی رہ گی کنبدی کنبدی دھپ
بدل اڈے شہر دے اتوں مٹی اڈی رڑیوں
کھلیاں باہواں اچیاں کردا رہ گیا پچھے رکھ
واہ نی عمرے ڈیگر ویلے پتر وانگوں جھڑیوں
نہ لبھن تھڑیاں تے لوکی نہ تندورے چنگ
تا نہ ہن تندروں اٹھن بھاہ نہ اٹھے تھڑیوں
واہ عمرے توں اپنے چانن تے کہرے وچ ڈبی
کس بنیرے اتوں دسیوں چن دے پچھوں چڑھیوں
میرا نانک دادک روہڑ کے اردو والیے غزلے
ہر شے ڈوب کے ساریاں وچوں ہن کس نوں لے کھڑیوں