گیت

الیاس آتش

چھیتی چھیتی گھر پھیرا پائیں سجنا
روگ ایہ وچھوڑے دے مُکائیں سجنا
لبھدیاں تینوں میرے بیتے کئی سال وے
تیرے باجھوں ویکھ میرے کیڈے بھیڑے حال وے
گھنڈ آ کے مکھڑے توں چائیں سجنا
روگ ایہ وچھوڑے دے مُکائیں سجنا
لبھ لبھ تینوں میں آں جھلی ہوئی سوہنیا
سُکھیاں دیوچ وی میں کلی ہوئی سوہنیا
آیا ایں تے ہن نہ توں جائیں سجنا
روگ ایہ وچھوڑے دے مُکائیں سجنا
ساہ دتے اپنے میں تیرے ناویں لا وے
دل وچ میرے اک وار پھیرا پا وے
لائیاں نی تے توڑ وی نبھائیں سجنا
روگ ایہ وچھوڑے دے مُکائیں سجنا
حل کوئی جان دا نہیں عشقے دے روگی دے
جانا پینا کول تینوں پیار والے جوگی دے
اوتھوں ای مراداں سب پائیں سجنا
روگ ایہ وچھوڑے دے مُکائیں سجنا
آتشا توں سوچ لویں بڑے اوکھے پینڈے نیں
اوکڑاں نیں راہ وچ سارے ایہو کہندے نیں
کوجھی آں میں نال سینے لائیں سجنا
روگ ایہ وچھوڑے دے مُکائیں سجنا
چھیتی چھیتی گھر پھیرا پائیں سجنا
روگ ایہ وچھوڑے دے مُکائیں سجنا