غزل

حنیف ساقی

اچن چیتی وتھاں پا کے چنگا نہیوں کیتا
میلے دے وچ ہتھ چھڈا کے چنگا نہیوں کیتا
شکر دوپہریں سورج ڈبدا سنیاں کدی وی نہیں سی
چٹے دن نوں رات بنا کے چنگا نہیوں کیتا
یاد تری وچ قلم قبیلہ اتھر اتھر ہویا
سجناں ساڈی کھیڈ ونجا کے چنگا نہیوں کیتا
راز بیابانی ہوراں نوں لکھ سلاماں آکھیں
اوہناں وکھری جھوک وسا کے چنگا نہیوں کیتا
فون آیا سی تیرا رل کے عید کراں گے سارے
عیدوں پہلاں مکھ لکا کے چنگا نہیوں کیتا
عابد ملے تے آکھیں سو چنیوٹ اے سُنجا سُنجا
آکھیں اوہنوں سانجھ مکا کے چنگا نہیوں کیتا
میخانے دی رونق تیرے نال سی بابا ساغر
ساقی کولوں مُکھ پرتا کے چنگا نہیوں کیتا