پنجاب تے پنجابی
ندیم افضل ندیم
سلوک وچہ برکت ہے ایہ اسی صدیاں توں سن دے آئے ہاں۔ ایہ سلوک بہن بھراواں ، رشتے داراں ، دوستاں ، محلے داراں، شہرداراں ، ملک چہ وسن والیاں ، مذہبی لوکاں دا یا کسے وی جگہ مطلب جانوراں دا ہووے سلوک دی برکت نوں اسی من دے وی ہاں پر اسی انسان ہو کے ساری سمجھ بجھ رکھدے ہوئے وی اپنا فیدہ چھڈ کے خورے گھاٹے والے پاسے کیوں جاندے ہاں۔ پنجابی زبان تے پنجاب نوں اک وڈا نقصان بے اتفاقی نے دتا اوناں نقصان سانوں ہو سکدا دوجیاںدیاں سازشاں نے نہ دتا ہووے جناں پنجابی دا نقصان اسی آپ کر لیا اے۔ پنجابی دا آکھان اے کہ ،ڈلہے بیراں دا کیہ وگڑیا ، ہن وی اسی اک کلے پنجاب تے پنجابی زبان نال پیارکرن دے نال نال پنجابیاں نال وی پیار کرئیے۔ اسی اج وی کسے بندے نوں اس کر کے نہیں پیار کردے کہ اوہ پنجابی ایہ صرف اس کر کے ملدے ہاں کہ اوہ بندہ سانوں کناں فیدہ دے سکدا سو اسی اپنا فیدہ تک کے کسے نوں ملدے ہاں تے اگوںاوہ وی اپنا فیدہ ویکھ کے تہانوں مل رہیا ہندا اے۔
سیانے آکھدے نے ، سپ نوں سپ لڑے تے وس کنوں چڑھے ،اج وی ساڈے دل نوں ڈر ہے کہ فلانیاں نال نہ لڑنا ایہہ سارے کٹھے ہو جاندے نے لیکن اج تک اسی ایہ اپنا آپ منوا ہی نہیں سکے کے پنجابی نوں کجھ نہ آکھو ایہ سارے کٹھے ہو جاندے نے جدوں اسی پنجابی لوکاں نوں پیار نہیں کردے تے میری جاچے زبان تے دھرتی نال پیار فضول تے بے معنی ایہ ہر لحاظ نال انسان اہم ایہ اسی پنجابی بولنے والیاں نال پیار کرئیے پنجابیاں نال پیار کرئیے پنجابی وی بچ جائے گی جے اسی اک پنجابی قوم ہی نہ بن سکے تے پنجاب نوں وی خطرہ تے پنجابی نوں وی خطرہ رہوے گا پنجابی پیاریو ڈٹ کے محبت نال پنجابی بولو اس تے مان کرو کہ اسی پنجابی ہاںپنجاب واسیاں نال محبت کرو کسے تھاں پنجابی اپنی آپ نوں اکلا محسوس نہ کرے پنجابی نوں اپنے آپ تے لاگو کروایہ سادھو ، سنت ، بھگت ، تے درویشاں دی بولی اس نوں کوئی خطرہ نہیں سانوں پنجابیاں نوں بس آپس وچہ محبت تے سلوک دا اک منظر دنیا نوں پیش کرنا پینا ہے فیر میرا یقین اے کہ دنیا بھر دے لوک پنجابی زبان سکھن گے ۔٭٭
