غزل

بیراجی

اج برداشوں باہر دھماکے
ہن چلنے نہیں تلی تلاکے
اسلحہ نہ کوئی لے کے نکلے
ہو جاون بند جے کر ناکے
لالچ ہوس دے ٹوئے ڈگدے
انھیاں کولوں ودھ سجاکے
تھوڑے انگلاں چٹن والے
مزے دے بوہنے ہون پچاکے
گھر گھر دے وچ کول برونہہ دے
چلن پیراں وچ پٹاکے
اسلحہ ڈھڈ تے بنھ رہے نیں
بال سی بھکھے آکے باکے
ڈردے سبھ اک دوجے کولوں
لمبڑ وی پنڈ وچ نہ ٹھاکے
کس توں دادا گیری پچھاں
آپے ونڈدے سبھ علاقے
دولت مند نوں نپو چھیتی
غربت کڈھدی بڑے کڑاکے
کیہ روندے او بھکھ دا رولا
فٹ پاتھاں تے وی نیں فاقے
دل دیاں گلاں مونہہ تے دسو
آپے لہہ جاندے نیں جھاکے
اغوا کدی نہ دھیاں ہوون
ویاہو چھیتی کڑیاں کاکے
کیوں نہ ہوون چوری ڈاکے
بیراجی سُتے نیں راکھے