نعت شریف

عبدالحمید نظامی

تتڑے دل پئے ٹھردے نیں نعلین مبارک تک کے
خالی کاسے بھردے نیں نعلین مبارک تک کے
ویکھے نیں تیرے عاشق اک نام تیرے دے اُتوں
بَن کے وکدے برَدے نیں نعلین مبارک تک کے
انسان رہے اک پاسے جنگل دے شیر وی تیرے
قدماں وچ سر دھردے نیں نعلین مبارک تک کے
ماں عائشہ دی چادر تے ہووے نور دی بارش
رحمت دے مینہ ورھ دے نیں نعلین مبارک تک کے
حوراں تے غلمان کھڑے وچ ملک نورانی سارے
چاکر تیرے در دے نیں نعلین مبارک تک کے
کیہجا ہووے گا سوہنا عقلاں نوں سوچی پا کے
دید تیری لئی مردے نیں نعلین مبارک تک کے
لا نہیں سکدا اندازا کوئی شان تہاڈی دا
وگڑے کم پئے سر دے نیں نعلین مبارک تک کے
یار نظامیؔ ہر ویلے میرے تے نین پرین
شکر دے سجدے کردے نیں نعلین مبارک تک کے