غزل

نائلہ بٹ

دن بن جاندے سال نی ویکھو
جد نہیں پچھ دا حال نی ویکھو
ویکھ کے چن دا چانن سڑدا
ٹردا جد او نال نی ویکھو
اوہدے سر دی چنی دے لئی
تارے بن دے جال نی ویکھو
بداں دی جے جے کار ہر پاسے
نیکاں دا پے گیا کال نی ویکھو
کنڈھ چوں چانن ڈھلکاں مارے
جد سر تے لیندی شال نی ویکھو
اوہدے موہرے ہار میں جاندی
جد وی چلدا چال نی ویکھو
کہندے کہندے رک جاندی آں
پچھدا جد او حال نی ویکھو
صورت اوس دی ڈٹھ جاوے تے
مینوں پیندا حال نی ویکھو
بندہ جا کے آپ اے پھس دا
سُٹدا جد او جال نی ویکھو
سوالی بن کے بہہ جاندی آں
ہورے دے دے گال نی ویکھو
جواب چہ منگاں گی میں اوہنوں
پچھے گا جے سوال نی ویکھو