غزل
سلیم نجمی
کئی آساں دے محل اسارے جیون دے بھرواسے
اوکھے سوکھے دِن گزارے جیون دے بھرواسے
کئی سدھراں دے گل وی گھٹے کوئی کوئی توڑ چڑھائیاں
کئی کئی چھڈیاں لا کے لارے جیون دے بھرواسے
کِہنوں کہنوں دسیے ایتھے خورے کِہندے کہندے
جذبے رہ گئے ادھ وچکارے جیون دے بھرواسے
کنیاں سوچاں سوچ کے رس گئی نیندر اکھاں وِچوں
سُفنے بھل گئے نین وچارے جیون دے بھرواسے
اج وی تھاں تھاں رلدے پھردے سکھ تے خشیاں
خورے کنے لیکھاں ہار ے جیون دے بھرواسے
کئی نیں جہڑے نت دے نت کھلارے کنجدے کنجدے
کر بہندے نیں ڈھیر کھلارے جیون دے بھرواسے
میں ویکھے نیں نجمی اوہ وی بالکل نیڑے جا کے
کر بہندے نیں دور کنارے جیون دے بھرواسے
