دو سُفنے
الیشع ایاز
دن چڑھے نہ مکن وچ آئے رات
اکھیاں ویڑھے پھردے سُفنے لم تلمے
پباں بھار کھلو کے پھڑ لیندے نیں تارے
ہتھ ایہناں دے چماں جاواں وارے وارے
نیندراں دے ایہ گہنے پلکاں دے لشکارے
کویلوں نہیں ایہ کردے رجھے رہندے کمے
اکھیاں ویڑھے پھردے سُفنے لم تلمے
میں وی سُفنا تیریاں ریجھاں چاواں دا
تینوں مان اے ڈب کھڑبیاں چھاواں دا
ایدھر ویکھ پُتر پنج دریاواں دا
جیبھ جویں ہے تھر تے بلھیں سکر جمے
اکھیاں ویڑھے پھردے سُفنے لم تلمے
