بابل ٹُر چلیا
نائلہ بٹ
لج نبھاون والا بابل ٹر چلیا
لاڈ لڈاون والا بابل ٹر چلیا
اوہدے نال ای گھر دا ویہڑا سجدا سی
اس دے ناں تے پیکا شہر وی وسدا سی
شہر دا او سرناواں بابل ٹر چلیا
کر کے سُنجیاں تھاواں بابل ٹر چلیا
اوہدے ناں تے شہر دی پرھیا سجدی سی
اوہدے کولوں بھکھ وی آ کے رجدی سی
پرھیا دی اوہ پگ سی بابل ٹر چلیا
روندا سارا جگ سی بابل ٹر چلیا
ہس کے ڈولی ٹوری پچھے رویا سی
کلیاں بہہ کے ہنجو ہار پرویا سی
سانوں چھڈ کے روندیاں بابل ٹر چلیا
ہنجو ہار پروندیاں بابل ٹر چلیا
جہڑا میرے اتھرو ویکھ نہ سکدا سی
میرے ہاسے نال اوہ کھڑ کھڑ ہسدا سی
کھیڈن، ہسن والا بابل ٹر چلیا
رستے دسن والا بابل ٹر چلیا
جہڑا میرے روسے تو ڈرجاندا سی
رس جاواں تے آپے فیر مناندا سی
میتھوں رس کے اج اوہ بابل ٹر چلیا
ساڈے سر دا کج اوہ بابل ٹر چلیا
اوہدی منجی ویڑھے آن وچھائی جے
دھی دے سر توں پیار دی چادر لاہی جے
بوہڑ دی گوہڑی چھاں سی بابل ٹر چلیا
اوہدا اُچا ناں سی بابل ٹر چلیا
اج کرلاندیاں ویکھ کہ سانوں اٹھیا نہیں
گل نال لا کے کسے وی سانوں پچھیا نہیں
پچھن دسن والا بابل ٹر چلیا
ہردم ہسن والا بابل ٹر چلیا
ویڑھے دے وچ لتھے لیڑے رہ گئے نیں
ویراں اتے مان وی کہڑے رہ گئے نیں
مان تراناں والا بابل ٹر چلیا
اُچیاں شاناں والا بابل ٹر چلیا
اوہدے باہجھوں وات کسے وی لینی نہیں
چڑیاں دی ایہہ ٹولی رل کے بہنی نہیں
ویڑھے سُنجے کر کے بابل ٹر چلیا
موت دے کولوں ہر کے بابل ٹر چلیا
مڑکے پھیرا کدی وی ایس نے پانا نہیں
مینوں آ کے سینے دے نال لانا نہیں
نت وچھوڑا دے کے بابل ٹر چلیا
ادھے کر کے پیکے بابل ٹر چلیا
