غور نال ویکھو سارے چور

نائلہ بٹ

سارے ملک نوں تڑکی جاون
بن بارش دے کڑکی جاون
خالی بھانڈے کھڑکی جاون
ایویں پاوندے بہتا شور
غور نال ویکھو سارے چور
اتوں رولا پائی جاندے
اندروں گلی لائی جاندے
رل مل سارے کھائی جاندے
آٹا چور تے چینی چور
غور نال ویکھو سارے چور
جے کر افسر پھیرا پاون
سب تے رعب اوہ خوب جماون
حل کوئی مسئلہ کر نہ پاون
وکھاندے سانوں سکی ٹوہر
غور نال ویکھو سارے چور
لچے نوں میں ویکھاں اچا
چودھری بنیا لنڈی بچا
غنڈی رن تے نالے لچا
رل کے پاوندے واہوا شور
غور نال ویکھو سارے چور
بٹ بٹ منہ پئے تکدے لوکی
کھان نوں روٹی لبھدے لوکی
ڈھڈ دی اگ نال سڑدے لوکی
حق اونہاں دا کھا گئے ہور
غور نال ویکھو سارے چور
اینکر گیت سناوندے ویکھو
گلمیاں نوں ہتھ پاوندے ویکھو
جھوٹھ نوں سچ بناوندے ویکھو
لا کے اپنا پورا زور
غور نال ویکھو سارے چور
اسمبلی سیٹاں ملن جہڑے
حق دین توں نسن جہڑے
قوم دے پاسے بھنن جہڑے
قوم نوں لارے لاوندے ہور
غور نال ویکھو سارے چور
غور نال ویکھو سارے چور