ساڈے آگو

بابا نجمی

ساڈے آگو بابا نجمی ٹکرو ٹکری ہوون گے
خورے کہڑے شیر بنن گے کہڑے بکری ہوون گے
ساڈے ویڑھے لگدا مینوں بھنگڑے پین گے بھکھاں دے
پھُلاں بدلے اگ بلے گی پت جھڑن گے رُکھاں دے
قرضہ ہور چڑھے گا اُتے یورپ تے امریکا دا
اگلا نعرہ دین گے آگو ہووے تھیہ امریکا دا
کرسی اُتے بہن دی سدھر سبھے لے کے چلے نیں
کجھ نیں چاتر جو نہیں دسدے کہڑے کہدے وَلّے نیں
دکھ وڑن گے ساڈے ویڑھے ایہناں دے ناں چمکن گے
جد مُڑاں گے ساڈے لیڑے لیراں وانگوں لمکن گے
جہنوں پھولاں اوہیو لگے سالا غزنی غوری دا
کوئی لطیف خٹک دا نہیوں شاہ حسین لہوری دا
جہنوں پچھو اوہیو آکھے میرے ورگا کوئی وی نہیں
ہر کوئی ایتھے وانگ سمندر بابا دریا کوئی وی نہیں