ادبی تنظیم’’محفل سجناں دی‘‘ ولوں سیالکوٹ وچ مشاعرہ تے ’’اکلاپا‘‘ دا مُکھ وکھالی اِکٹھ
رپورٹ: آفاق بٹ
25 مارچ جمعے دے دیہاڑے ڈسکہ شہر دے کینال ویو ٹان وچ اردو دے جگ دھمے شاعر افتخار شاہد تے سیالکوٹ دی سب توں وڈی پنجابی ادبی تنظیم’’ محفل سجناں دی ‘‘ ولوں بوہت سوہنی سلکھنی محفل دا پربندھ کیتا گیا۔ ایس محفل دا آہر پیرس توں آئے شاعر عاشق حسین رندھاوی ہوراں دی پنجابی کتاب ’’اکلاپا‘‘ دی مکھ وکھالی دے آدر وچ کیتا گیا۔ اے ڈسکے شہر دی تاریخ دا سب توں وڈا تے کامیاب مشاعرہ سی۔ ایس مشاعرے دے پہلے حصے دے پردھان پنجابی دے وڈے سیوک تے سچے شاعر ڈاکٹر احسان اللہ طاہر ہوری سن تے دوسرے حصے دے پردھان اردو ادب دے استاد شاعر جان کاشمیری ہوری سن تے ایس مشاعرے دی نقابت عامر رفیق عامر ہوراں کیتی ۔کتاب تے شخصیت بارے ڈاکٹر اکبر علی غازی تے شبیر بلو ہوراں اپنے وچار سانجھے کیتے لاہور، گوجرانوالہ، سیالکوٹ، پسرور، ڈسکہ دے شاعراں تے محفل سجناں دی پوری تنظیم نے ایس مشاعرے وچ بھرویں رلت کیتی تے ورہیاں تیکر یاد رہن والے ایس مشاعرے دا آنند مانیا۔ ایس مشاعرے وچ ڈاکٹر اکبر علی غازی ، عدنان قلزم رانجھا، جی ایم واصف ، رضا المصطفے نقشبندی ، محترمہ سمیرا ساجد ، طاہر خیال ، راجہ عتیق انورراجہ، ملک عابد اعوان ، جمیل ساحل ، عمران ساگر، جاوید کنول موسی پوری، محترمہ شاذ ملک ، شبیر بلو صراف ، شبیر
شاہد صاحب، سلطان ضیغم جعفری، امجد ساگر، میاں یوسف ،جاوید مہدی، احمد ریاض رانا، محمد اعجاز التاثیر، محترمہ حسنی عامر، ہوراں اپنے سوہنے سلکھنے کلام نال بہت داد وصولی کیتی تے دوجی وڈی گل اے کے ڈسکہ شہر دے لوکاں وی بھرویں رلت کر کے لانبھوں اون والے شاعراں تے لکھاریاں نوں مان دتا ادب دی چنگی چوکھی سیوا لئی بھرویں گل بات وی ہوئی تے ایس ادبی تنظیم، محفل سجناں دی، دے ایس آہر نوں دونواں پردھاناں تے اچیچے پروہنیاں وچوں عتیق انور راجہ تے ملک عابد اعوان نے بوہت ای سوہنے اکھراں نال سراہیا اخیر تے ساریاں پروہنیاں نوں چنگا سوہنا ان پانی وی کرایا گیا۔
