رمضان مبارک
ندیم افضل ندیم
رب دا ایہ خاص مہمان آ گیا
زندگی چہ ساڈی رمضان آ گیا
ہر تھاں اے رحمتاں دا مینہ وسدا
سانوں ایہ عبادتاں دی جاچ دسدا
گنہگاراں نوں ایہ بخشان آ گیا
رب دا ایہ خاص مہمان آ گیا
زندگی چہ ساڈی رمضان آ گیا
جنتاں دے بوہے رب کھول دیندا اے
لٹ لوو رحمتاں ایہ بول دیندا اے
رحمتاں تھیں جگ نوں رجان آ گیا
رب دا ایہ خاص مہمان آ گیا
زندگی چہ ساڈی رمضان آ گیا
ایویں تے نہیں جگ اتے دھماں پے گئیاں
رحمتاں جہان اتے آ کے بہہ گئیاں
دوزخاں چوں سانوں ایہ چھڈان آ گیا اے
اک دوجے نال اسیں چنگا بولاں گے
افضل سارے اسیں پورا تولاں گے
رب نال بندے نوں ملان آ گیا
رب دا ایہ خاص مہمان آ گیا
زندگی چہ ساڈی رمضان آ گیا
