نظــم
نائلہ بٹ
میں مرزا وکھری سوچ دا
میری ویلے اتے اکھ
میں توڑے جندرے ریت دے
ہن پچھلی امید نہ رکھ
جگ شریکے مہنے مارنے
تے پت ہو جانی ککھ
جے عشق ویراں دا ماردا
ایس پینڈے پیر نہ رکھ
رل جھوٹی پینگھ عشق دی
ہن لینی پوو میری پکھ
میرے تیر نہ ٹنگیں رکھ تے
میں سانبھاں دشمن لکھ
رکھ بانہہ سرہانے نہیں سوونا
لیا مزا نیندر دا چکھ
میری گھوڑی ٹاپاں ماردی
تے اڈدے جاندے ککھ
جے تو صاحباں سچے قول دی
ہن ہوویں نہ توں وکھ
مینوں رکھاں سوہنے رب دیاں
جگ ویکھے میری دکھ
