نہلے تے دہلا

مطلوب ورائچ

3اپریل 2022ء یکم رمضان المبارک پاکستان دی تریخ وچ اک منفرد دن اے۔ اک دن وچ اینی سیاسی‘ آئینی تے قنونی ڈویلپمنٹس پہلے کدی ویکھن وچ نہیں آئی۔ کجھ چر پہلاں جدوں پی ڈی ایم دی بڑی ہوا سی اوہنوں استعفیاں دے راہیں عمران خان دی حکومت توں نجات دی راہ نظر آئی۔ 9 دیاں 9پارٹیاں سوائے پی پی دے استعفیاں تے تیار سن۔ اک وڈا جلسہ ہویا جہدے نال آصف زرداری نے خطاب کردے ہوئے اسمبلیاں توں استعفیاں دا آپشن رد کردے ہوئے آکھیا کہ میں ڈکٹیٹر مشرف نوں ددھ وچوں مکھی وانگوں باہر کڈھ دتا سی۔ عمران خان کیہ چیز اے تے فیر زرداری نے ساریاں پارٹیاں نوں نال ملا کے عمران خان نوں اقتدار چوں کڈھن دا جال وچھایا۔ اک موقعے تے ن لیگ تے مولانا فضل الرحمن نے زرداری دی پارٹی نوں پی ڈی ایم چوں اوسے طرح باہر کڈھیا سی جس طرح زرداری جنرل مشرف نوں اقتدار چوں باہر کڈھن دے دعویدار سن۔ عمران خان دے خلاف تحریک عدم اعتماد لیاندی گئی جہدے تے تن اپریل نوں ووٹنگ ہونی سی۔ اپوزیشن دے نال تحریک انصاف دے ویہہ دے نیڑے باضمیر ارکان وی سن۔ عدم اعتماد دی تحریک ٹھاہ ہون دی وجہ اوہ امریکہ توں آیا دھمکی آمیز خط بن گیا جہدے وچ کہیا گیا سی کہ عمران خان دے خلاف تحریک عدم اعتماد کامیاب ہوندی اے تے پاکستان نوں معاف کر دتا جاوے گا۔عمران خان وزیراعظم رہندے نیں تے پاکستان نتیجہ بھگتن لئی تیار رہوے۔ ایہ خط امریکہ وچ پاکستانی سفیر اسد مجید دے حوالے کیتا گیا۔ عمران خان نے ست مارچ نوں ملن والے ایس خط نوں سیاسی طور تے استعمال کردے ہوئے 27مارچ دے جلسہ عام وچ لہرایا تے اک دو دن بعد ایہنوں قومی سلامتی کمیٹی دے اجلاس وچ رکھیا۔ 7مارچ نوں ایہ خط ملیا تے اٹھ مارچ نو ںاپوزیشن تحریک عدم اعتماد وی لے آئی۔ ایس خط نوں اپوزیشن تے اوہدے کجھ بانی جھوٹ دا پلندہ قرار دیندے رہے پر قومی سلامتی کمیٹی دے اجلاس وچ ایہدی سچائی تے حقیقت تے مہر تصدیق ثبت کر دتی گئی۔ عمران خان دے خلاف تحریک عدم اعتماد وچ نمبر پورے سن پر ووٹنگ دی نوبت نہیں آئی۔ عمران خان ایہ بیانیہ اسٹیبلش کرن وچ کامیاب ہو گئے کہ تحریک عدم اعتماد دے پس پردہ امریکہ دا ہتھ اے۔
3اپریل نوں ووٹنگ توں پہلاں وزیر قنون نے سپیکر دے سامنے ایہو سوال اٹھاندے ہوئے تحریک مسترد کرن دی گزارش کیتی تے ایہدے نال اتفاق کردے ہوئے تحریک مسترد ہوئی۔ جہدے نال اپوزیشن دیاں امیداں مٹی وچ مل گئیاں تے شیروانیاں سلیاں ای رہ گئیاں۔ مولانا فضل الرحمن صدر پاکستان‘ شہبازشریف وزیراعظم بنن دے سپنے دیکھ رہے سن۔ سیاست وچ خواب ویکھن تے پابندی نہیں پر حقائق توں وی اکھ نہیں چرائی جا سکدی۔ ساڈی سیاست وچ وی کیہ کیہ شاہکار نیں راتوں رات وفاداریاں بدل لئیاں جاندیاں نیں۔ لوٹے ہون دی سعادت حاصل کرکے اپنیاں اولاداں دا مستقبل تابناک بناندے ہوئے اوہناں نوں شرمناک زندگی گزارن تے مجبور کر دتا جاندا اے۔ معاشرے وچ تھوہ تھوہ ہوندی اے پر لوٹا کریسی دی اوہو لوک حوصلہ افزائی کر رہے نیں جو اوہدے خلاف قنون لیائے سن تے کل تک سپیکر دی رولنگ نوں حتمی قرار دین والے اج اوہدے الٹ موقف لے کے عدالت دے بوہے تے سوالی بنے بیٹھے نیں۔ کجھ میڈیا ہائوسز ایازصادق دے اجلاس دی صدارت کرن نوں ودھا چڑھا کے پیش کر رہے نیں اوہ پینل آف سپیکرز وچ ضرور شامل نیں پر سپیکر نے اجلاس ملتوی کر دتا سی جو صدر دے طلب کرن تے ای منعقد ہو سکدا اے۔
قومی اسمبلی دے اجلاس وچ اپوزیشن ولوں پیش کیتی جان والی تحریک عدم اعتماد رد ہو گئی تے وزیراعظم نے قنونی اختیار ہتھ وچ آندیاں ای اسمبلی توڑ دتی تے معاملہ زرداری صاحب دی پی پی سپریم کورٹ لے گئی۔ اوتھے سپیکر دی رولنگ رد کرن دی استدعا کیتی گئی جو رد کر دتی گئی۔ سپریم کورٹ نے اصل وچ ازخود نوٹس لیا سی۔ سیکرٹری داخلہ تے سیکرٹری دفاع نوں نوٹس دتا گیا تے اداریا ںنوں کاروائی توں روک دتا گیا۔ سپریم کورٹ نوں اصل وچ چنتا کسے ادارے دے غیرآئینی اقدام دے امکان دی سی۔ اودھر گورنر پنجاب نوں برطرف کر دتا گیا جو محسن کشی تے تیار عمران خان دے پروگرام دے خلاف بروئے کار سن۔ مبینہ طور تے اوہ پرویزالٰہی دے خلاف لیگی کیمپ دی کمپین کر رہے سن۔ عمران خان کامیاب ہوئے تے پاکستان اک غیرملکی سازش توں محفوظ رہیا۔ ایہدے تے قوم مبارکباد دی مستحق اے۔ عمران خان نوں گران دی سازش کرن والے بے مراد رہے تے جدوں فل سوئنگ تے تحریک سی تے ٹٹ گئی تڑک کرکے۔
دوستو! پاکستان اپنی 73سالہ زندگی وچ اینے نازک دور توں شاید ای کدی گزریا ہووے کیوں جے باہر دے دشمناں دی پچھان تے مقابلہ کرنا سوکھا ہوندا اے پر گھر دے بھیدی لنکا ڈھائے دے مصداق اپنی بغل وچ چھپے مخالفین نال نبڑنا ڈھیر اوکھا کم اے۔ اوہ طاقت جو پاکستان دے امن دیاں چولاں ہلانا چاہندی اے اوس قوت نے پاکستانی غداراں لئی لوٹ سیل لا دتی تے دوجے پاسے اقتدار دے راہیں پاکستان دا قومی خزانہ لٹن والیاں نے اپنی لٹی ہوئی دولت نوں تحفظ دین لئی نوٹاں نال بھریاں بوریاں دے منہ کھول دتے۔ یقینی طور تے اوہناں دا ہدف پاکستان دے وکلاء‘ صحافی‘ جوڈیشری‘ اعلیٰ عدلیہ‘ بیوروکریٹس تے عسکری قوتاں نیں کیوں جے اک زرداری سب تے بھاری اے۔ قارئین اجہے مشکل حالات وچ عمران خان دا اگے ودھنا اک معجزے توں گھٹ نہیں۔٭٭