غزل

عدل منہاس لہوری

کدے سڑن جوگا کدے ٹَھرن دے لئی
عذاب موسماں دے جُثہ جرن دے لئی
پندھ پیش نے پہلے طُغیانیاں دے
اُتوں چڑھ آیا بدل وہرن دے لئی
کِناں مشکل اے شکاری نوں کی دَساں
جُوہ چیتے آں دی جیناں ہرن دے لئی
خورے کنیاں پُھلاں دا خُون ہویا اے
تیری عطر دی شیشی اک بھرن دے لئی
کہو رُکھاں نوں کونپلاں کُنج رکھن
اُوٹھ باغ وچ آئے نے چرن دے لئی
تیرے در دے لائق نئیں سیس میرا
پَر، لے آئیاں دہلیزتے دھرن دے لئی
آجا کھیڈیے پیار دی یار بازی
نہ جتن دے لئی نہ ہرن دے لئی
گھڑا کچا تے چائیے جُنون پکا
ایس عشق چناں وچ ترن دے لئی
عدؔل مفلسی پیش نئیں جان دیندی
دل تے بہت کرد اے کُج کرن دے لئی