کافی

شفیق قریشی

نج ویاہے نین نی اڑیو
نج ویاہے نین
میں برہوں دی جمی جائی
مینوں گڑھتی سکاں دی
گوڑھے رنگ میں کتھوں پانے
میں آں ماری پھکاں دی
میں کنڈیاں دی سیج تے بیٹھی
پا کے کڑتی پھلاں دی
ویلا کدھرے نس گیا اے
لالی کھوہ کے بلھاں دی
لگ سینے نال جہڑے کہڑے
لیڑے کردے وین… نی اڑیو
نج ویاہے نین
اوہ نہ ڈانگ الارے تے
نہ مارے ہورا مُکی
مہنیاں دی ایہہ پنڈ نہیں ہن
میتھوں جاندی چکی
لک تے دوہرا چوہرا ہویا
جند اجے نہیں مُکی
مرنوں پہلاں مل نہیں سکنا
کتے وی مینوں چین… نی اڑیو
نج ویاہے نین‘ماریا جاندا اوہ ویلا جد
نیناں دتی ہار
میں اڈ جانی ویکھ نہ سکی
اوہدی اکھ دا وار
اوہدی اکھ نے کپ کے مینوں
سٹیا ادھ وچکار
میرے ساتھی ہوکے ہاڑے
آئے مینوں لین… نی اڑیو
نج ویاہے نین