غزل

حنیف ساقی

پیار دی بھٹھی چاہڑ کے مینوں سوچاں اگاں بال دیاں
سیک ہجر دا ساڑی جاندا سدھراں انج وصال دیاں
ہنجواں دے نال بھریاں اکھاں اج وی تینوں بھالدیاں
بھیڑے ویلے کہڑا دیوے خبراں تیرے حال دیاں
ادریویں دی سوڑ توں آپے عید دیہاڑے آ ملیا
اکو واری نکل گئیاں نیں کسراں سارے سال دیاں
اکھر چاواں دے لیکے نیں ہنجواں دا ہڑھ پی پی کے
شعر چ لاٹاں تاں آئیاں نیں تیرے حسن جمال دیاں
میں کوئی جگوں وکھرا تیری زلف دا قیدی ہویا نہیں
قیس ہوری وی کھول نہیں سکے گنجھلاں عشق دے جال دیاں
تیریاں سوچاں سوچ مری نوں ول سکھایا سوچن دا
چن تے سورج مینوں جاپن کرناں تیری شال دیاں
سولہویں سال توں اگے تے فر اللہ جانے کیہ ہووے
صدیاں لین بلاواں تیرے کلے سولہویں سال دیاں
ساقی وانگوں ڈنگ لنگھاویں تینوں ہوشاں آ جاون
ربا نیڑے آ کے ویکھیں گزراں کدی کنگال دیاں