رومن بادشاہواں دا عظیم تماشا
وسعت اللہ خان
نواں سرکس سج چکیا اے۔ بازی گر اپنی اپنی تھاں سنبھال چکے نیں۔ نقرئی بھونپورنگ ماسٹر دے ہتھ وچ اے۔ سیاست بازاں دے قدم تے جنتا دیاں نظراں راجدھانی ول تے منہ اسمان ول۔ لوو اک ہور جشن مرگ حسرت شروع ہو رہیا اے۔ رومن بادشاہواں نے دو ہزار ورھے پہلے لوکاں دا دل جتن دا اجیہا راہ وکھایا کہ اوہناں دے بعد آن والا ہر حکمران رومناں دا احسان مند اے۔ جدوں وی لوک روٹی منگن اوہناں نوں چن وکھا دیو‘ احتساب دی خواہش کرن تے سرکسیت وچ الجھا دیو‘ ساہ گھٹن دی شکایت کرن تے اوہناں توں چوسے خزانے دے منہ کھول دیو‘ غربت تے دھاڑن تے اوہناں دا لشکر بنا کے اگے بھل دیو یاں فیر عظیم الشان سطوت ناک تعمیراتی منصوبیاں وچ کجھ دیہاڑیاں دی مزدوری تے لگا دیو۔ عزت نفس منگن تے نادیدہ خطریاں دے سائے ناک دے اگے لہرا دیو۔ فیر وی نہ ڈرن تے بہلاوے دی خاطر مفت سرکس دا اعلان کر دیو جتھے سر اچھالے جان گے تے دھڑ اٹھائے جان گے‘ جانور بھڑائے جان گے۔ غلاماں نوں بھکھے شیر پاڑ کھان گے تے زندہ بچ جان والیاں نوں زرہ بکتر وچ غرق گلیڈیٹرز پارچہ در پارچہ کٹ دین گے۔ ایس طرح وحشت عام نوں کجھ عرصے دا قرار آ جاوے گا تے بادشاہت نوں وی تھوڑی ہور مہلت مل جاوے گی۔ فیر جو خرچہ دل لبھان تے توجہ ہٹان تے ہویا اوہ محصولات تے جرمانیاں دی شکل وچ اوہناں توں دگنا وصول ہووے گا تے ایہناں حربیاں پاروں فیر بے چینی ودھن لگے تے اک واری فیر پہلے توں وی وڈے سرکس دے انعقاد دا اعلان ہو جاوے گا۔
لوکاں نوں ان پڑھ رکھنا تے ایہدے تے فخر سکھانا بقا دوام لئی بہوں ضروری اے۔ روزمرہ زندگی دیاں بیڑیاں نال بنھ کے رکھو گے تے اوہناں دی زندگی ایسے الجھائی ہوئی رسی دی گنڈھ کھولدے کھولدے گزر جاوے گی تے فیر اوہناں دی اک ہور نسل ایسے عذاب دا جوا موڈھے تے رکھن لئی تیار ہو چکی ہووے گی۔ اوہ نسل جہنوں تعبیر نہیں خواب چاہیدے نیں۔ اجہی نسل جہنوں منزل نہیں رہنما چاہیدا اے اجہی نسل جہنوں گڑ نہیں گڑ ورگی گل چاہیدی اے۔ جہنوں حل توں ودھ دلاسہ چاہیدا اے جہنوں مداوا نہیں مداوے جہی مسکراہٹ چاہیدی اے تے جو چند سر پھرے ایہناں مورکھاں نوں پردے دے پچھے ہون والیاں سازشاں دے محرکین دکھان دی کوشش کرن اوہناں تے راز فاش کرن دی کوشش تے دھرتی و دین و سماج دشمنی دا فتویٰ لا کے ایسے مجمعے دے ہتھوں مروا دیو۔ ایس طرح ہور کجھ عرصے چین دی بانسری وجائو تے سرکس لائو تے باغ وکھائو۔ رومن غریب کردے وی تے کیہ کردے۔ اوہناں نوں سرکشی دے خاتمے لئی ایناں زیادہ سرکسی کشٹ ایس طرح اٹھانا پیندا کہ اودوں نہ میڈیا سی نہ سوشل میڈیا۔ نہیں تے لوکاں نوں سراب دکھان تے بے وقوف بنان لئی سلطنت رومتہ الکبری نوں ایناں صرفہ کیوں کرنا پیندا۔ لوک اپنے خرچے تے ای دھوکھا کھان لئی بے تاب رہندے۔
بھاڑ وچ گئی بے روزگاری‘ خودکشیاں‘ انتہاپسندی‘ جہالت‘ دہشت گردی‘ کرپشن‘ اقرباپروری‘ فاقہ مستی۔ سانوں تے سرکس چاہیدی اے‘ سچ دی پوشاک وچ لپٹا سفید جھوٹ چاہیدا اے دو گھڑی تھر کے ہلکا ہون دا بہانہ چاہیدا اے سانوں تے قنون دے قالب وچ منظم لاقانونیت چاہیدی اے سانوں نظام نہیں بدلنا اک ہور آس‘ اک ہور وعدے‘ اک ہور خواب دے بدلے انانیت ویچنی اے۔ سانوں رائے شماری توں ودھ رائے جمع کرن والی پیٹی بھرنی اے سانوں نویں چہرے نہیں سجرے مکھوٹے پسند نیں۔ ماضی سانوں یاد نہیں‘ مستقبل اسیں ویکھیا نہیں۔ ساڈے تے ساڈیاں نسلاں لئی بس اک ای زمانہ اے تے اوہ اے حال۔ حال اجے کسے طرح نال گزر جاوے کل کنہے ویکھیا سی کل کنہے ویکھیا اے۔ بڑی بک بک ہو گئی۔ سرکش دا ویلا نکل چکیا اے ہے تے پرانا پر کجھ کرتب نویں وی نیں بازی گر اوہو سہی پر لباس پہلے توں وکھرے نیں پر رنگ ماسٹر اوہی اے۔ یعنی پچھلے رنگ ماسٹر دے وارث دے وارث دے وارث دا جانشیں۔ عظیم الشان سرکس دے صدر دروازے نال جڑے پھٹیاں تے رقص دے ناں تے کھسریاں دی دھماچوکڑی اوسے طرح جاری اے تے خلقت وی ہمیشہ وانگوں سرخوش و سرمست نیند وچ جاگ رہی اے۔
مجال کس کی کہ جنبش کرے رضا کے بغیر
جو رقص میں ہے اجازت کے ساتھ رقص میں ہے
(افتخار عارف )
