غزل
امین خیال
جتھے دل دا درد سنایاں گل نہیں بننی
اوتھے کوئی وی گل بنایاں گل نہیں بننی
اپنا آپ بچاون لئی کجھ کرنا پینا
خالی اوہدے وار بچایاں گل نہیں بننی
رولا پایاں دل تے ہولا ہو جانا ایں
ایپر اوتھے رولا پایاں گل نہیں بننی
اوہ آئے تے چھا گئے اپنے وصفاں پاروں
بن وسبوں بن صفتوں چھایاں گل نہیں بننی
آخر سچ ہد ماہنو نے ای گل بنانی
جھوٹھ موٹھ دے چونے چایاں گل نہیں بننی
اس پتھر تعریف وی سن کے موم نہیں ہونا
اوہدے جس یا گیت وی گایاں گل نہیں بننی
بھلن بہیے ہور خیال اوہ کھچاں پاوے
ایسراں اوہنوں دلوں بھلایاں گل نہیں بننی
