نعت شریف
اقبال راحت
اسماناں تے بہہ کے کلم کلا رہ کے
اک دن آپ خدا آپے ای بول پیا
دھرتی تے اسمان خلقت اتے جہان
چانن اتے ہنیرے سجرے نور سویرے
دریا نہراں کھالے ککر پوہ تے پالے
بدل مینہہ برساتاں بڑیاں ہور سوغاتاں
جنگل بیلے باراں آڈاں کھوہ جھلاراں
پھل تے پھلیاں سارے پھلاں بھرے کیارے
سورج چن ستارے اک توں ودھ نظارے
چڑیاں مور چکور لکھ جنور نیں ہور
تتلیاں رنگ برنگ سندر اک اک انگ
ون سونیاں چیجاں پر نہ لاہون ریجھاں
حوراں تے غلمان راہواں پئے سجان
سب تیتھوں قربان زمیں ست اسمان
آ میرے دلدار میں دتا عرش شنگار
راحت کول بٹھا کے رج رج کراں دیدار
