غزل
حنیف ساقی
صورت ویکھ کے نیت ڈولن لگ پئی اے
نظر حسن دے بوجھے پھولن لگ پئی اے
سرمد مارن والیو‘ میں وی آیا جے
میری گونگی سوچ وی بولن لگ پئی اے
دھی جمی نوں حالے سال وی ہویا نہیں
غربت اکھ چ مہندی گھولن لگ پئی اے
اک تسے معصوم دا قصہ پڑھدیاں ای
اکھ وگاتیاں مشکاں ڈوہلن لگ پئی اے
سفنے دے وچ روسے ویکھ کے ماہی دے
جھلی ہجر دی گنجھل کھولن لگ پئی اے
سارے لاگ مبارکاں میتھوں لے کے وی
اڑیا کہہ کے کھہن وچولن لگ پئی اے
ساقی موڑ مہار وچھوڑے مُک جاون
اڑیا تیری تانگھ مدھولن لگ پئی اے
