غزل
آتش کیانی
تیری ذات تے آساں مینوں ہور کسے تے مانا نہیں
جہنے اوہدے در توں منگیا خالی اس پرتانا نہیں
سورج وانگوں واٹ توں نپیں اصغر شاہ فرمایا اے
اکو تھاں توں جھولی بھر لے تھاں تھاں سیس نوانا نہیں
بھل بھلیکھے بھل جے ہووے مرداں وانگر منیا کر
اپنی کیتی کرنی نوں توں ہور کسے سر پانا نہیں
بیتے بارے کیوں میں سوچاں گزرے نیں کتھ اونا ہتھ
آون والا کل اے میرا ماضی نوں دھرانا نہیں
جینا مرنا اکو گل اے مر کے وی کئی جیندے نیں
روز قیامت تیکر سچیاں مٹی تھلے آنا نہیں
پورس ورگے ٹر گئے ایتھوں جہڑے شاناں والے سن
ایتھے پکے بنھ کیوں لانے جتھے اصل ٹھکانا نہیں
بندیاں کولوں آس نہ رکھیں جہڑے آپوں عاجز نیں
آتش اوہدے در توں منگیے جہنے کدے جتانا نہیں
