غزل
انورمسعود
چھڈ دلا اے طفل تسلی بھلکے کنہے آؤنا
اگوں تیری مرضی بیبا ساڈا کم سمجھاؤنا
جْھلے ہوا تے پتا نہ لگے کویں دہاڑی لنگھی
گْمے دے وچ اوکھا ہوندائے جھٹ دا جھٹ لنگھاؤنا
اچن چیت گلی دے اندر بالاں رولا پایا
ابھڑ واہے جاگ پیا میں مْکا خواب ڈراؤنا
حشر دیہاڑے اکھاں وچ میں بھر کے لے گیا ہنجو
کوجھی گل سی خالم خالی بھانڈے دا پرتاؤنا
رنگلے رنگلے ریجھ پٹولے آپوں دل وچ جوڑاں
بالک نوں پیا جھڑکاں دیواں ہتھوں چھڈ کھڈاؤنا
اکھیاں کولوں رُس کے نیندر انج گئی اے انور
جیویں ایس پروہنے ایتھے مْڑ نہیں پھیرا پاؤنا
