غزل
الیاس آتش
پیو دا مان ودھاون دھیاں
لُونا مِسا کھاون دھیاں
پُتر روون زر دولت نوں
پیو دا درد ونڈاون دھیاں
پُتر چھڈ جاندے نیں پیو نوں
عمراں ساتھ نبھاون دھیاں
پُت کپت ہندے میں ویکھے
پیو توں واری جاون دھیاں
ماپیاں وچ ان بن ہووے تے
ماپیاں نوں سمجھاون دھیاں
پیو دا قرض اتارن دے لئی
پیو دا ہتھ ونڈاون دھیاں
پیو دی پگ نوں داغ نہ لگے
پیو دی پگ بچاون دھیاں
پیو جے ڈگ پوے تے آتش
پیو نوں آن اٹھاون دھیاں
