کمال رستہ حسین ؑ دا اے
علی احمد گجراتی
کمال رستہ حسین ؑ دا اے یقین رستہ حسینؑ دا اے
ایہ کر بلا توں گزر کے جاندا حسِین رستہ حسینؑ دا اے
ٹُرے گا جیہڑا یقین لے کے کدے وی حق توں جدا نہ ہو سی
جہان اندر کُجھ ایسراں دا مُبین رستہ حسینؑ دا اے
رسول ؐ برحق نے حق پرستی دے جیہڑے دسّے اُصول جگ نوں
بغیر شک دے اُنہاں دا جگ تے امین رستہ حسین ؑ دا اے
رسول ؐ تیکر وی ایہو جاندا تے حق دے تیکر وی ایہو جاندا
خدا دی قسمے خدا گواہ اے جو دین رستہ حسین ؑ دا اے
بغیر ڈَر دے سمے دے ہَرہَریزید اگے قیام کرنا
جے سِکھنا ہووے تے جگ تے بس بہترین رستہ حسین ؑ دا اے
