غزل
کلیم شہزاد
تیرے کولوں سوچاں نوں پابند نہیں کیتا جانا
ساتھوں اپنے دل دا بوہا بند نہیں کیتا جانا
جیون ہو گیا آ انگلاں وچ انگلاں پا کے ٹریئے
میتھوں کلیاں جیون والا پندھ نہیں کیتا جانا
منگواں چانن لے کے میں نہیں گھر نوں روشن کرنا
انکھ نوں میتھوں چن دا حاجت مند نہیں کیتا جانا
پلے خرچ سفر دا نہیوں ساہ دی پونجی مکی
دور دراڈی منزل دا سربندھ نہیں کیتا جانا
ساہواں والے دھاگے انجے ای الجھے رہنے ساتھوں
اوہدی یاد دا تانا تندوتند نہیں کیتا جانا
اسیں کلیم جے ضد تے آ گئے ویکھیں ساڈے راہ دی
اوہدے کولوں اپنی ضد نوں کندھ نہیں کیتا جانا
