خواب عذاب
خالدحسین تھتھال
پانی تیزاب بن جاندا اے
خواب عذاب وی بن جاندے نیں
تعبیراں تقصیراں ہو جاندیاں نیں
ساہ وی چھوٹے ہو جاندے نیں
پینڈے کھوٹے ہو جاندے نیں
خوشیاں غمیاں بن جاندیاں نیں
رنگ بے رنگ ہو جاندے نیں
سنگ کسنگ وی ہو جاندے نیں
اپنے پرائے ہو جاندے نیں
ہوند انہوندہو جاندی اے
ہیٹھلی اُپر ہو جاندی اے
جنّت دوزخ بن جاندی اے
بندے پشوں بن جاندے نیں
کِنس لوبھ طمع تعصّب
اک دوجے دا ویری بنا دیندے نیں
ہمت کر کے ویر کرودھ
دے ہتھوں بچنا پیندا اے
