یار امریکہ دے
بابا نجمی
ویکھ لئے توں کارے یار امریکہ دے
ہن تے نہ جا دوارے یار امریکہ دے
کر دتا اے آپ نتارا ویلے نے
میرے باجھوں سارے یار امریکہ دے
تینوں لبھ نہیں سکدا کوکا سونے دا
نکلے نیں سنیارے یار امریکہ دے
ساڈے اُتے ایسراں حکم چلاندا اے
جسراں اسیں مزارے یار امریکہ دے
مٹی ہوگئی اندروں حالت عرباں دی
ہو گئے وارے نیارے یار امریکہ دے
تیرا کسراں قاعدہ پڑھن صدام حسین
جہناں پڑھے سپارے یار امریکہ دے
ہونجھ رہیا اے اک بھرا دی دولت نوں
اک تے چلدے آرے یار امریکہ دے
