غزل

بابا نجمی

شیشے اُتے دھوڑاں جمیاں کندھاں جھاڑی جاندے نیں
جلداں سانبھ رہے نیں جھلے ورقے پاڑی جاندے نیں
اوہناں دا وی توہیوں رب ایں ایہدا اج جواب تے دے
عیداں والے دن وی جہڑے کرن دیہاڑی جاندے نیں
جہناں دے گل لیراں پئیاں اوہناں ولے تکدے نہیں
قبراں اُتے تلے جڑیاں چدراں چاڑھی جاندے نیں
رسی کتھوں تیک کریں گا ڈھلی اوہناں لوکاں دی
جہڑے اک حویلی بدلے جھگیاں ساڑی جاندے نیں
شیشے اُتے ملے سیاہیاں حق اے میرے دشمن دا
سجناں نوں کیہ بنیاں میرے پھُل لتاڑی جاندے نیں
چل اوئے بابا نجمی اپنے پنڈاں نوں مونہہ کر لیئے
شہراں دے وسنیک تے اپنے شہر اجاڑی جاندے نیں