آکھن لوک سیانے

احسان باجوہ

ایہنیں تِلیں تیل نہیں’ ٹِیندیں نہیں کپاہ
معنے: ایہنیں: ایہناں٭ تِلیں: تِلاں وِچ٭ ٹِینڈِیں: ٹِینڈیاں وِچ۔
ویروا: ایس اکھان وِچ مت دِتی گئی اے پئی کئی واری کِسے دا واہ ای کِسے اجیہے بھیڑے بندے نال پے جاندا اے پئی اگلے اوسدے لوک لکھ ترلے وی کردے رہن پر اوہناں دے ترلیاں دا اگلے اثر نہیں کردے اتے اوسدی ماسہ شرم نہیں کردے۔
ایہنیں خراسیِں اجیہا ای پیِسدا دا اے / ایہنِیں گھڑاٹیں’ اجیہا ای پیِسیِندا اے
معنے: خراسِیں: ڈنگر جو کے آٹا پِیسن والی مشِین
ویروا: ایس اکھان وِچ مت دِتی گئی اے پئی بھَیڑے لوکاں کولوں کدی وی بھلا نہیں ہو سکدا۔اتے اوہ اپنِیاں عادتاں توں باز نہیں آؤندے۔اوہناں نال لکھ چنگا ورتارا کر لئو’ اوہناں لئی مکھن دے بن جاو پر اوہناں نُوں کدی شرم نہیں آؤندی اتے اوہ اپنی فِطرتوں باز نہیں آؤندے۔
بابے بِناں بکرِیاں نہیں چردِیاں
معنے: بِناں: بغَیر۔
ویروا: ایس اکھان وِچ مت دِتی گئی اے پئی سیانے بندیاں توں بغَیر کدی وی کوئی کم سِرے نہیں چڑھدا۔بال ایانے لکھ چاتر وی ہو جان پر اوڑک تگڑے کماں دا گویڑ سیانے بابے ای لا سکدے نیں اتے اوہناں توں بَناں کم نہیں سردا۔
باپ بھلا’ نہ بھئےِا’ سبھ توں بھلا روپئیا
معنے: بھِئیا: بھرا۔
ویروا: ایس اکھان وِچ مت دِتی گئی اے پئی کئی لوک اپنے نِگدے ساکاں نُوں وی بھُلھ بھُلا کے بس پَیسے دے ای پُتر بن کے رہ جاندے نیں۔اوہناں دا دین دھرم اتے انگ ساک بس پیسے ای ہوندے نیں اتے اوہ پیسے توں بِناں کِسے نال گل کرن وی چنگا نہیں جان دے۔
باتوں کھُنجیا بندا’تے ڈالوں کھُنجیا باندر’ فیر نہیں سنبھلدا
معنے: کھُنجیا: گھُسیا۔
ویروا: ایس اکھان وِچ مت دِتی گئی اے پئی ہر گل ویلے تے ای پھبدی اے۔ اتے جدوں ویلا لنگھ جاوے اتے بندہ اِک واری گل توں کھُنج جاوے تاں ساری عُمر اوس گل نُوں پچھتاندا رہندا اے۔اتے اوہ ویلا پرت کدی ہتھ نہیں آؤندا۔٭٭