غزل
ارشاد کھوکھر
اکھ دا اک اشارہ چاہیدا
سوہنا اک نظارہ چاہیدا
جو چمکارے ہر دم سانوں
ایہہ جیہا اک ستارہ چاہیدا
ظلم نوں جہڑا کٹی رکھے
ہر تھاں ایہہ جیہا آرا چاہیدا
بنگلے کار دی لوڑ نہیں سانوں
سُکھاں دا اک ڈھارا چاہیدا
تھوڑے نال ہن رج نہیں ہونا
پیار تیرا اج سارا چاہیدا
کل دا نخرہ چنگا لگیا
اوہو اج دوبارہ چاہیدا
دور تھکاوٹ کرن دی خاطر
تیرا اج لتاڑا چاہیدا
بوتل چاء نہیں چنگی لگدی
پانی سانوں کھارا چاہیدا
رہوے گا فیر ارشاد جیوندا
سجن تیرا سہارا چاہیدا
